इन्द्रेणीपोष्ट
काठमाडौं । तिहार बिदापछि खुलेको सेयरबजार पहिलो दिन नै दोहोरो अंकले घटेको छ । आज (सोमबार) पुँजीबजार मापक परिसूचक (नेप्से) १९.२० अंकले घटेर २८२९.६५ विन्दुमा ओर्लिएको छ । तिहार बिदाअघिको अन्तिम दिन ५.२२ अंकले बढेको नेप्से २८४८.८४ विन्दुमा बन्द भएको थियो ।
नेप्सेमा आज कारोबार पनि चार अर्ब ४२ करोड सात लाख १९ हजार रुपैयाँमा खुम्चिएको छ । कूल २३० वटा कम्पनीका ७२ लाख सात हजार ३९६ कित्ता सेयर ४९ हजार ५३० पटक किनबेच भएका थिए ।
आज ठूला कम्पनीको सेयर कारोबार मापन गर्ने सेन्सेटिभ परिसूचक भने २.७१ अंकले घटेर ५२८.३७ विन्दुमा ओर्लिएको छ ।
आज आईसीएफसी फाइनान्स लिमिटेड र साहस ऊर्जा कम्पनीको सेयर मूल्य १० प्रतिशतले बढेपछि सकारात्मक सर्किट लागेको थियो । अन्य तीन कम्पनीको मूल्य पनि सर्किट लेभलनजिक पुगेको थियो । सपोर्ट माइक्रोफाइनान्स वित्तीय संस्था लिमिटेडका लगानीकर्ताले सबैभन्दा धेरै ७.९६ प्रतिशतका दरले गुमाएका छन् ।
आज महालक्ष्मी विकास बैंकको सेयर सबैभन्दा धेरै ५२ करोड १० लाख तीन हजार रुपैयाँ बराबरको कारोबार भएको छ । सोही बैंकको सेयर सबैभन्दा धेरै छ लाख ७८ हजार ६२५ कित्ता तथा नबिल बैंकको सबैभन्दा धेरै दुई हजार ७३८ पटक किनबेच भएको नेप्सेले जनाएको छ ।
