इन्द्रेणीपोष्ट
काठमाडौं । यो सातामा नेपाल स्टक एक्सचेञ्ज (नेप्से) ८० अंकले बढेर बन्द भएको छ । साताका पाँच दिन नै कारोबार हुँदा परिसूचक दुई दिन गिरावट र तीन दिन उकालो लागेको थियो । आइतबार र बिहीबार घटेको नेप्से सोमबार, मंगलबार र बुधबार भने उच्च अंकले बढेको थियो ।
साताको पहिलो कारोबार दिन आइतबार परिसूचक १ अंकले घटेको थियो । त्यसपछि सोमबार २६ अंक, मंगलबार ६९ अंक र बुधबार १६ अंकले बजार बढेको थियो । लगातार तेस्रो दिनको वृद्धिसँगै परिसूचक २७ सय अंकबाट बढेर २८ सय १ अंकमा पुगेको थियो । यद्यपि, बिहीबार ३२ अंकले घटेसँगै परिसूचक फेरि २७ सय ६९ अंकमा छ ।
गत साताको अन्तिम कारोबार दिन बिहीबार नेप्से परिसूचक २६ सय ९० अंकमा थियो । जुन, यो सातामा निरन्तर उकालो लाग्दै २७ सय ७० अंक नजिक पुगेको हो । यस्तै, यो नेप्से परिसूचकसँगै साता कारोबार रकम पनि उकालो लागेको छ ।
साताभरमा नेप्सेमा करिब २८ अर्ब रुपैयाँ बराबरको कारोबार भएको छ । नेप्सेमा आइतबार ४ अर्ब ९ करोड, सोमबार ४ अर्ब ७३ करोड, मंगलबार ५ अर्ब ५२ करोड, बुधबार ७ अर्ब ३७ करोड र विहीबार ६ अर्ब २७ करोड रुपैयाँको कारोबार भएको नेप्सेले जानकारी दिएको छ ।
