एजेन्सी
उत्तर कोरियाले संयुक्त राष्ट्रसंघ सुरक्षा परिषद्को संकल्पहरूलाई उल्लङ्घन गर्दै परमाणु र ब्यालिस्टिक क्षेप्यास्त्र कार्यक्रमलाई निरन्तरता दिएको छ ।
संयुक्त राष्ट्रसंघका विज्ञहरूले नयाँ प्रतिवेदमा उत्तर कोरियाले आणविक उपकरणका कम्पोनेन्टहरू उत्पादन गर्ने क्षमतासहित आफ्नो परमाणु र ब्यालिस्टिक क्षेप्यास्त्र कार्यक्रमहरू विकास गर्ने कार्य जारी राखेको बताएका हुन् ।
प्रतिबन्ध सम्बन्धी स्वतन्त्र अनुगमनकर्ताहरूको वार्षिक प्रतिवेदन शुक्रबार साँझ संयुक्त राष्ट्रसंघ सुरक्षा परिषद्को उत्तर कोरिया प्रतिबन्ध समितिमा पेश गरिएको थियो ।
उत्तर कोरियाले नयाँ छोटा तथा मध्यम दूरीका क्षेप्यास्त्रहरू उल्लेखनीय रूपमा बढाएको छ । उसले सम्भावित हाइपरसोनिक क्षेप्यास्त्र सहित नयाँ प्रविधिको परीक्षण गरेको विज्ञहरूले बताएका छन् ।
उत्तर कोरियाले यो ज्यानुअरीमा मात्रै छोटा एवं मध्यम दूरीका झण्डै आधा दर्जन क्षेप्यास्त्र परीक्षण गरेको छ ।
