काठमाडौं । जापानको ओसाका प्रान्तअन्तर्गतको सकाई सहरमा रहेको तेल प्रशोधन केन्द्रमा शनिबार बिहान ग्यास चुहावटको घटना भएको छ ।
घटनामा एक जना श्रमिकको निधन भएको छ भने दुई जनाको उपचार भइरहेको स्थानीय सञ्चारमाध्यमले जनाएका छन्।
घटना बिहान करिब १० बजेको भएको बताइएको छ । प्रशोधन केन्द्रको पाइप प्रणालीमा ग्यास चुहावट भएको र केही श्रमिक अचेत अवस्थामा भेटिएका छन् ।
प्रारम्भिक अनुमानअनुसार, चुहिएको ग्यास विषालु हाइड्रोजन सल्फाइड हुन सक्ने जनाइएको छ । हाल घटनाको कारणबारे सम्बन्धित कम्पनीले आवश्यक अनुसन्धान गरिरहेको छ ।
सात लाख ७० हजार वर्गमिटर क्षेत्रमा फैलिएको यो प्रशोधन केन्द्र समुद्री किनारमा अवस्थित र जापानकै एक प्रमुख इन्धन प्रशोधन स्थलको रूपमा परिचित छ ।
