काठमाडौँ, २५ असार । एउटै व्यवस्थापमा सञ्चालित द इन्साइट भिजन सेकेन्डरी स्कुल र राजधानी क्याम्पसले एएफसी वुमेन्स एसियन कप छनोटमा उत्कृष्ट प्रदर्शन गरेकी कप्तान सावित्रा भण्डारी (साम्बा) सहित १० खेलाडीलाई नगद र छात्रवृत्ति सहित सम्मान गरेको छ ।

धुम्बाराहि स्थित स्कुलमा आज आयोजित कार्यक्रममा कप्तान सावित्रा सहित, अनिता बस्नेत, रेखा पौडेल, सविता रानामगर, पूजा राना सहित राष्ट्रिय टिमकी पूर्वकप्तान अनु लामा, हिराकुमारी भुजेल, युवा खेलाडी सावित्री किसान, कुसुम खतिवडा र सुनकला राईलाई जनहि रु १० हजार  र समग्रमा १८ लाख बढीको छात्रवृत्ति सहित सम्मान गरेको छ । उनीहरूलाई काठमाडौँ महानगरपालिका–४ का वडाध्यक्ष दिनेश महर्जनले स्कुलका संस्थापक प्रधानाध्यापक भीमकुमार श्रेष्ठ, अखिल नेपाल फुटबल सङ्घ एन्फाका सहायक महासचिव दामोदर बद्री भट्टराई लगायतले नगद सहित सम्मानपत्र प्रदान गरेका थिए।

महिला फुटबलमा लगानी बृद्धि गर्नुपर्ने मा जोडदिर्दे काठमाडौँ महानगरपालिका–४ का वडाध्यक्ष महर्जनले भन्नुभने, “महिला टिमले थोरै लगानीमै देशको लागि उत्कृष्ट प्रदर्शन गरेका छन् । त्यसैले उनीहरू हाम्रो समाजका हिरो हुन् । हामीले खेलाडीलाइ उत्साहित बनाउनका लागि खेलकुदमा थप लगानी गर्न आवश्यक छ ।”

द इन्साइट भिजन स्कुलका संस्थापक प्रधानाध्यापक भीमकुमार श्रेष्ठले भनेका छन, “हाम्रा खेलाडीहरूले अन्तरराष्ट्रिय प्रतियोगितामा उत्कृष्ट खेल प्रदर्शन गर्दै देशको प्रतीष्ठा बढाएका छन् । हामीले सम्भावना देखेरै उनीहरूलाई औपचारिक शिक्षामा पनि सहज तवरले अगाडि बढ्न सकियोस भनेर ४ वर्ष यता महिला फुटबलमा धेरैलाई छात्रवृत्ति दिएका छौँ । अहिले साम्बा सहित १० जनाले पूर्ण छात्रवृत्रिमा बीबीएस अध्ययन गरिरहेका छन् । यसरी नै हामी खेलाडीहरूको हौसला बढाउँदै जानेछौँ ।”

सम्मानपछि कप्तान सावित्राले भनिन, “सबैले आ–आफ्ना क्षेत्रमा मिहिनेत गर्नुपर्छ । फुटबलसँगै औपचारिक शिक्षालाई अगाडि बढाउने अवसर दिएर ‘इन्साइट भिजन’ ले हामीलाई यहाँ उभिने अवसर दिएको छ । यसको लागि इन्साइट भिजन तथा राजधानी क्याम्पसलाई धेरै–धेरै धन्यवाद दिन चाहान्छु ।” 

एउटै व्यवस्थापनमा सञ्चालित द इन्साइट भिजन सेकेन्डरी स्कुल र राजधानी क्याम्पसमा पुरुषको राष्ट्रिय टिम तथा उमेर समूहका १४ जना फुटबलर पनि छात्रवृत्तिमा अध्ययन गरिरहेका छन् । अन्तरराष्ट्रिय फुटबलमा सर्वाधिक गोलकर्ता नेपाली सावित्रासहित पूजा, अनिता, रेखा र सविताले एसियन कप छनोट खेलेका थिए । 

उज्वेकिस्तानको तास्कन्दमा भएको छनोटमा नेपाल घरेलु टिम उज्वेकिस्तानविरुद्ध टाइब्रेकरमा पराजित हुँदै अर्को वर्ष अस्ट्रेलियामा हुने एसियन कपमा स्थान बनाउन असफल भएको थियो । तर, टिमको प्रदर्शन उत्कृष्ट रह्यो । नेपालले सुरूका दुई खेलमा लाओसलाई ९–० र श्रीलङ्कालाई ८–० ले हराएको थियो ।