इन्द्रेणीपोष्ट
सिरहा, १७ साउन — सिरहाको औरही गाउँपालिका–४ कमलपुरबाट १०३ किलो गाँजासहित नौ जनालाई प्रहरीले पक्राउ गरेको छ । आज बिहान ४ बजे विशेष सूचनाका आधारमा जिल्ला प्रहरी कार्यालय सिरहाले छापा मारेर उनीहरूलाई नियन्त्रणमा लिएको हो ।
पक्राउ पर्नेहरूमा पाँच भरिया, एक रेक्की गर्ने व्यक्ति, गाँजाको साहु र खरिद गर्न आएका दुई जना भारतीय नागरिक रहेका छन् । जिल्ला प्रहरी प्रमुख एसपी अनन्तराम शर्माका अनुसार भरियामा गोलबजार–१ मक्सारका जयराम जोशी ४२, शिवकुमार सदा ३०, कृष्ण सदा २२, सुरज सदा १८ र पशुपति सदा १७ छन् ।
रेक्की गर्ने व्यक्ति औरही–३ का राजेन्द्र यादव ४२ र गाँजाको साहु गोलबजार–१ मक्सारका जीवछ साह ३२ रहेका छन् । खरिद गर्न आएका भारतीय नागरिक मधुवनी जिल्ला, कुमरखद–१४ का धर्मेशकुमार कामति ३० र वैधनाथ चौधरी ३९ रहेका छन् । चौधरीको साथबाट नेपाली रुपैयाँ ४५ हजार पनि बरामद गरिएको छ ।
प्रहरीका अनुसार गाँजा पाँच बोरा प्लास्टिकमा प्याक गरी आँपको बगैचामा लुकाइ राखिएको थियो । प्रारम्भमा भरिया पक्राउ परेपछि विस्तृत अनुसन्धानका क्रममा अन्य व्यक्ति गाँजासहित फेला परेको हो । पक्राउ परेकाविरुद्ध लागुऔषधसम्बन्धी मुद्दामा अनुसन्धान भइरहेको प्रहरीले जनाएको छ ।
आइतबार, साउन १८ गते २०८२
Aug 03 2025 Sunday
