इन्द्रेणीपोष्ट
काठमाडौँ, २१ साउनः देशभर सक्रिय रहेको मनसुनी प्रणालीका कारण कोशी र सुदूरपश्चिम प्रदेशमा भारी वर्षाको सम्भावना रहेको मौसम पूर्वानुमान महाशाखाले जनाएको छ । महाशाखाले ती प्रदेशहरूमा पर्ने सम्भावित वर्षाले जनजीवन, स्वास्थ्य, सडक तथा हवाई यातायातमा असर पार्न सक्ने भन्दै सतर्कता अपनाउन आग्रह गरेको छ ।
महाशाखाका अनुसार मनसुनको न्यून चापीय रेखा अहिले नेपालको तराई भूभाग हुँदै सरेको छ, जसको प्रभावले कर्णाली र सुदूरपश्चिम प्रदेशलगायत देशका पहाडी क्षेत्रहरूमा व्यापक बदली देखिएको छ । बाँकी भूभागमा सामान्य बदलीको अवस्था छ ।
मधेस प्रदेशका केही स्थानमा र अन्य केही प्रदेशमा मध्यम खालको वर्षा भइरहेको छ भने दिउँसो लुम्बिनी, कर्णाली, सुदूरपश्चिम र कोशी प्रदेशका पहाडी भागमा मध्यम वर्षा तथा केही स्थानमा भारी वर्षा हुन सक्ने महाशाखाको अनुमान छ ।
रातिसम्म पनि देशभर सामान्य बदलीको अवस्था रहनेछ । कोशी र मधेस प्रदेशका केही स्थानमा तथा बागमती, गण्डकी र सुदूरपश्चिमका थोरै स्थानमा मध्यम वर्षा हुन सक्ने सम्भावना रहेको छ । विशेषगरी कोशी प्रदेशको एक–दुई स्थानमा भारी वर्षाको सम्भावना भएकाले स्थानीय प्रशासन र सर्वसाधारणलाई आवश्यक सतर्कता अपनाउन महाशाखाले पुनः आग्रह गरेको छ ।
बुधबार, साउन २१ गते २०८२
Aug 06 2025 Wednesday
