इन्द्रेणीपोष्ट
काठमाडौं । चीनमा ४० लाख जनसंख्या रहेको एक सहरमा पूर्ण लकडाउनको आदेश जारी गरिएको छ । सहरमा कोरोना संक्रमण बढ्न थालेपछि लकडाउनको आदेश जारी गरिएको हो ।
सहरका बासिन्दालाई अत्यावश्यक बाहेक घरभन्दा बाहिर ननिस्कन भनिएको छ । अहिले चीनमा कोरोना भाइरसको संक्रमणका केस निकै कम छन् ।
तर गान्सु प्रान्तको राजधानीमा लान्जुमा लकडाउन लागू गरिएको हो । समाचार एजेन्सी एएफपीका अनुसार सहरका अधिकारीहरूले मानिसहरूलाई लान्जुमा प्रवेश गर्न र त्यहाँबाट बाहिर जान पूर्ण रूपमा रोक लगाएका छन् ।
यसअघि पनि उत्तरी चीनमा हजारौँ मानिसहरूलाई घरमै रहन आदेश दिइसकिएको छ । चीनमा कोरोनाको डेल्टा प्लस भेरियन्ट फैलिन थालेको छ ।
याे भेरियन्टमा झन् तीव्र गतिमा फैलिन सक्ने सामर्थ्य रहेकाे विज्ञहरूले बताएका छन् । चीनमा परीक्षण बढाए संक्रमितको संख्या बढ्न सक्ने स्वास्थ्य अधिकारीहरूले बताएका छन् ।
