इन्द्रेणीपोष्ट
‘जागिर वा करिअर बदल्नु विवाह गर्नुभन्दा पनि कठिन निर्णय हो । अनि योभन्दा पनि कठिन निर्णय हो– लामो समय वैवाहिक जीवन बिताएर सम्बन्ध विच्छेद अर्थात् डिभोर्स गर्नु’, एक नयाँ अध्ययनले यस्तो निष्कर्ष निकालेको छ ।
अनुसन्धानकर्ता अभिभाको प्रतिवेदनअनुसार सर्वेक्षणमा सहभागी सबैभन्दा धेरै (३१ प्रतिशत) मानिसले लामो समयको वैवाहिक सम्बन्ध अन्त्य गर्ने निर्णय जीवनकै सबैभन्दा कठिन बताएका हुन् ।
सर्वेक्षेणमा सहभागी एकचौथाइ भन्दा धेरै (२७ प्रतिशत) व्यक्तिले भने एउटा करिअरबाट अर्को सुरु गर्नु जीवनको सबैभन्दा कठिन निर्णयमध्ये एक भएको बताएका छन् । त्यस्तै २५ प्रतिशत व्यक्तिले चाहिँ विवाहको निर्णय गर्न पनि उत्तिकै कठिन भएको बताए ।
यस्तै अध्ययनले ठूल्ठूला निर्णय गर्नुपर्दा ४९ प्रतिशत मानिसमा ‘एन्जाइटी र स्ट्रेस’ हुने गरेको पनि देखाएको छ । यस्तै अध्ययनले अल्छी गर्ने, कामलाई पछिका लागि पन्छाउने, समयमा निर्णय नगर्ने स्वभावका ११ प्रतिशतभन्दा बढी मानिसले जागिर, घरलगायत विभिन्न महत्त्वपूर्ण अवसर गुमाउने गरेको पनि देखाएको छ ।
