इन्द्रेणीपोष्ट
काठमाडौं । प्रमुख प्रतिपक्षी दल नेपाली कांग्रेसले सहकारी ठगी प्रकरणमा संलग्न गृहमन्त्री रवि लामिछानेको राजीनामाको विकल्प नभएको बताएको छ ।
कांग्रेसले गृहमन्त्री लामिछानेबारे संसदीय छानबिन समितिको मुद्दाबाट अगाडि बढ्नुपर्ने बताएको छ । कांग्रेस सचेतक रमेश लेखकले भने, ‘अब संसदीय समितिभन्दा त अगाडि बढ्छ । राजीनामासम्म पुग्छ ।’
यसअघि चालु हिउँदे अधिवेशनमा कांग्रेसले संसद् अवरुद्ध बनाउँदै आएको थियो । उसले गृहमन्त्री सहकारी ठगी प्रकरणमा संलग्न भएको भन्दै संसद्मै नाराबाजी गर्नुका साथै अवरोध गरेको थियो । कांग्रेसले गृहमन्त्रीको छानबिन वा राजीनामा बटम लाइन बनाएको छ ।
‘सहकारीबाट रित नपुर्याएर ऋण लिएको भनिएको छ । त्यो ऋण अहिलेसम्म पनि तिर्न बाँकी छ भनेको छ । प्रधानमन्त्रीले रवि लामिछाने निर्दोष छन् । कुनै प्रमाण छैन । प्रहरीसँग मैले कुरा गरिसकेँ भन्नुहुन्छ । त्यसैले यो मुद्दा अलि पेचिलो बन्दै जान्छ,’ लेखकले भने ।
इलाका प्रहरी कार्यालय बुटवलले जिल्ला सरकारी वकिल कार्यालयमा बुझाएको अनुसन्धान प्रतिवेदनमा गृहमन्त्री लामिछानेले सहकारीबाट गैरकानुनी रूपमा २ करोड रुपैयाँ रकम लिएको उल्लेख छ ।
