इन्द्रेणीपोष्ट
काठमाडौं । आर्थिक वर्ष २०७९/०८० को नीति तथा कार्यक्रम तथा बजेटबारे प्रदेश नम्बर १ का १४ वटै जिल्लामा सुझाव संकलन गरेर मन्त्रीहरु राजधानी विराटनगर फर्किएका छन् ।
तल्लो तहसम्मै पुगेर सुझाव संकलन गर्दा वास्तविकतामा आधारित भएर बजेट बनाउन सहयोग मिल्ने प्रदेश सरकारको भनाइ छ ।
प्रदेशका मन्त्री तथा सचिवहरु, योजना आयोगका पदाधिकारी गएर सुझाव संकलन गरेको र यही साता स्थानीय तहका सबै प्रमुख र उपप्रमुखको भेला गरेर पनि सुझाव संकलन गरिने सरकारको भनाइ छ।बजेटमा समेट्नुपर्ने विषय तथा स्थानीय स्तरको आवश्यकताका योजनाहरु मसिनोसँग बुझ्ने र जनता तथा सरोकारवाला पक्षसँग छलफल अन्तरक्रिया गरेरै बजेट बनाउने उद्देश्यले सबै जिल्लामा छलफल गरिएको आर्थिक मामिलामन्त्री इन्द्र आङ्बोले जानकारी दिए ।
‘तीन तहका सरकार बीचको समन्वयको अवस्था, आयोजनाको दोहोरोपनको समस्याबारे यो छलफलले धेरै वस्तुगत अवस्था प्रष्ट पारेको छ’, मन्त्री आङ्बोले भने, ‘आजसम्ममा सबै जिल्ला पुगेको टोली विराटनगर आइपुग्दैछ । संकलित सुझावलाई नीति कार्यक्रम तथा बजेटमा समेट्ने प्रयास हुनेछ ।’
छलफलबाट असार १ मा आउने प्रदेशको र स्थानीय तहको असार १० गते आउने बजेट निर्माणमा पनि पृष्ठपोषण र सहजीकरण हुने आर्थिक मामिला तथा योजना मन्त्रालयले जनाएको छ । प्रदेश सभाको दशौं तथा बजेट अधिवेशन जेठ १६ गते सोमबारबाट सुरु हुँदैछ ।
अधिवेशनको पहिलो दिन सोमबार सरकारले बजेटको सिद्धान्त र प्राथमिकता सदनमा पेश गर्दैछ । जेठ २५ मा नीति तथा कार्यक्रम प्रदेश प्रमुखले प्रस्तुत गर्नेछन् ।
