इन्द्रेणीपोष्ट
काठमाडौं । विश्व बैंकका दक्षिण एसिया हेर्ने उपाध्यक्ष मार्टिन रेजर आगामी वैशाखमा हुने तेस्रो लगानी सम्मेलनमा सहभागी हुन नेपाल आउने भएका छन् ।
विश्व बैंकका उपाध्यक्षत्रय रेजर, आकिहिको निसिओ र ग्वान्झे चेनसँग भएको भर्चुअल बैठकमा अर्थमन्त्री वर्षमान पुनले रेजरलाई लगानी सम्मेलनमा सहभागी हुन निमन्त्रणा गरेका हुन् ।
औपचारिक रूपमा यसअघि नै निमन्त्रणा पठाइसकिएको स्मरण गराउँदै मन्त्री पुनले लगानी सम्मेलन निर्देशक समिति अध्यक्षका हैसियतले व्यक्तिगत रूपमा पनि निम्तो दिएका हुन् । जवाफमा रेजरले निमन्त्रणाका लागि धन्यवाद दिँदै आफू लगानी सम्मेलनमा सहभागी हुने बताए ।
उनले अन्तर्राष्ट्रिय लगानीकर्तालाई समेत लगानी सम्मेलनमा आउन प्रोत्साहित गर्ने बचन दिए । ‘मलाई निमन्त्रणा गर्नुभएकोमा धन्यवाद दिन्छु र काठमाडौंमा भेट्ने बाचा गर्छु’, मन्त्री पुनसँग रेजरले भने ।
उपाध्यक्ष रेजरले लगानी सम्मेलनका क्रममा नेपालका अधिकारीहरूसँग हुने औपचारिक र अनौपचारिक भेटमा नेपाल र विश्व बैंकबीचको विकास साझेदारीमा थप सहकार्यका क्षेत्रबारे कुराकानी गर्न इच्छुक रहेको बताए ।
अर्थमन्त्री पुनले नेपालले वैदेशिक लगानीसहित निजी क्षेत्रको भूमिका र पुँजी परिचालनलाई उच्च प्राथमिकतामा राखेको उल्लेख गरे । लगानी सम्मेलनका लागि आवश्यक कानुनी र प्रक्रियागत सुधारका काम अघि बढेको जानकारी उनले दिए ।
सम्मेलनलाई नेपालले अवसरका रूपमा लिएको भन्दै विश्व बैंकसहित विकास साझेदार बताउँदै उनले विश्व बैंकसँगको सहकार्य आगामी दिनमा अझ सुदृढ हुने विश्वास व्यक्त गरे । तेस्रो लगानी सम्मेलन आगामी ९-१० वैशाखमा हुँदैछ ।
