इन्द्रेणीपोष्ट
काठमाडौं । यो साता लगातार तेस्रो दिन सेयरबजारमा ठूलो गिरावट आएको छ । आज मंगलबार पनि सेयरबजारमा ७० अंकको पहिरो गएको हो ।
नेपाल स्टक एक्सचेन्जका अनुसार नेप्से उक्त अंकले घटेर २६१५.४० विन्दुमा र सेन्सिटिभ सूचक ११.४२ अंकले घटेर ४९४.९१ विन्दुमा रोकिएको छ । आजको कारोबारमा २१८ कम्पनी सामेल भएका छन् । तिनीहरुको १ करोड ३० लाख कित्ता सेयर बिक्री भएको हो ।
दिनभरिमा ७५ हजार ३ सय ७४ पटकको खरिदबिक्रीमा ५ अर्ब ७४ करोड ५४ लाखको मात्र कारोबार भएको नेप्सेले जनाएको छ । आज सबै उपसूचकहरु राताम्य छन्। मनकामना स्मार्ट लघुवित्त र मैलुङ खोलाको १० प्रतिशतले सेयर मूल्य बढे पनि अरु कम्पनीका लगानीकर्ताले कमाउन सकेका छैनन् ।
आज पनि अधिकांश कम्पनीका सेयरधनीले घाटा व्यहोरेका छन् । आज एउटा कम्पनीको अधिकतम १८ करोडसम्म मात्रै कारोबार भएको छ । यसअघि आइतबार र सोमबार पनि नेप्से दोहोरो अंकले घटेको थियो ।
