इन्द्रेणीपोष्ट
काठमाडौँ, १२ भदौः अख्तियार दुरुपयोग अनुसन्धान आयोगले जाजरकोटको भेरी नगरपालिकामा वडा कार्यालय भवन निर्माणका क्रममा आर्थिक अनियमितता गरेको अभियोगमा आठ जना कर्मचारी तथा ठेक्का कम्पनीविरुद्ध विशेष अदालतमा भ्रष्टाचार मुद्दा दायर गरेको छ ।
आर्थिक वर्ष २०८०÷८१ मा वडा नं ६, ९ र १० को वडा कार्यालय भवन निर्माण ठेक्का प्रक्रियामा सार्वजनिक खरिद कानुन विपरीत कार्य भएको ठहर गर्दै आयोगले निमित्त प्रमुख प्रशासकीय अधिकृत दलबहादुर घर्ती, इञ्जिनियर मोहन मल्ल, कानुन अधिकृत प्रकाशकुमार शाही, सामाजिक विकास अधिकृत अनिस साह, लेखापाल राजेन्द्रबहादुर कठायत र जिन्सी शाखा प्रमुख कृतिबहादुर थापाविरुद्ध मुद्दा दायर गरेको हो ।
आयोगले उनीहरूमाथि रु ३६ लाख २० हजार ५७८ बराबरको बिगो मागदाबी गरेको छ । यस्तै, ठेक्का प्रक्रिया अनियमिततामा संलग्न भएको ठहर गर्दै न्यू विके नहकुली जेभी निर्माण कम्पनी र सो कम्पनीका सञ्चालक गङ्गाकुमारी खड्का तथा चित्रबहादुर बोहोरासँग समेत समान बिगो माग गरिएको आयोगले जनाएको छ ।
आइतबार, भदौ १५ गते २०८२
Aug 31 2025 Sunday
