इन्द्रेणीपोष्ट
काठमाडौँ, १४ भदौ – चाडपर्व नजिकिँदै गर्दा काठमाडौं महानगरपालिकाले बजार अनुगमन कडा पारेको छ । यस क्रममा धनुषा डिस्टिलरी प्रालिद्वारा उत्पादित ‘मुस्ताङ गोल्ड’ नामक मदिरामा सिलबन्दी बोतलभित्र झिँगा फेला परेपछि उद्योगमाथि कारबाही गर्दै कामपाले रु २ लाख जरिवाना गरेको छ ।
कामपाको कृषि तथा पशुपक्षी विभागका प्रमुख नुरनिधि न्यौपानेका अनुसार उपभोक्ताको गुनासोका आधारमा नमूना जाँच गर्दा अखाद्य वस्तु भेटिएको पुष्टि भएको हो ।
त्यस्तै, वसन्तपुर र इन्द्रचोक क्षेत्रमा अनुगमन गर्दा ३१ लिटर अखाद्य तेल नष्ट गरिएको छ । कामपाले चार रेस्टुराँ र एक मिठाई पसलमा स्वच्छता अभाव भेटिएको भन्दै व्यवसायीलाई तेल बारम्बार प्रयोग नगर्न, खाद्यवस्तु छुट्टै भण्डारण गर्न र सरसफाइमा ध्यान दिन निर्देशन दिएको छ ।
कामपाले बजारमा बिक्री हुने खाद्य तथा पेय पदार्थको गुणस्तर सुनिश्चित गर्न नियमित अनुगमनलाई निरन्तरता दिने प्रतिबद्धता जनाएको छ ।
आइतबार, भदौ १५ गते २०८२
Aug 31 2025 Sunday
