थियानजिन चीन, १४ भदौ । प्रधानमन्त्री केपी शर्मा ओलीले चीनका राष्ट्रपति सी चिनफिङसँगको द्विपक्षीय भेटवार्तामा लिपुलेकलाई व्यापारिक मार्ग बनाउन चीन र भारतबीच भएको सहमतिप्रति नेपालको स्पष्ट आपत्ति व्यक्त गरेका छन ।
थियानजिनमा शाङ्घाई सहयोग सङ्गठन एससिओ को शिखर सम्मेलनमा सहभागी हुन पुगेका ओलीले भेटवार्तामा सार्वभौम नेपाली भूमि लिपुलेकसम्बन्धी निर्णय नेपालको सरोकारबिना गरिएको भन्दै असहमति प्रष्ट पारे । “सन् १८१६ को सुगौली सन्धिबमोजिम महाकालीपूर्वका भूभागहरू नेपालकै हिस्सा हुन्, यस विषयमा चीनले नेपालको पक्ष लिनेछ भन्ने विश्वास लिएको छ,” ओलीले भनेको परराष्ट्र मन्त्रालयका सचिव अमृतबहादुर राईले जानकारी दिएका छन ।
राष्ट्रपति सीले नेपाल–भारतबीचको छलफलमार्फत निष्कर्षमा पुग्नुपर्ने चाहना राख्दै नेपालको अडानलाई सम्मान गर्ने बताएका थिए । भेटमा दुवै नेताबीच द्विपक्षीय सम्बन्ध मजबुत बनाउने, सहकार्यका संयन्त्र सक्रिय गर्ने र बेल्ट एन्ड रोड इनिसियटिभ बिआरआई अन्तर्गतका परियोजनामा द्रुत गति दिन्ने सहमति भएको बताइएको छ ।
भेटमा प्रधानमन्त्रीका सल्लाहकार डा युवराज खतिवडाले चीन नेपाललाई निर्यात बढाउन गुणस्तरीय कृषि उत्पादनमा सहयोग गर्ने, थप नाका सञ्चालन गर्ने र नेपाललाई भूपरिवेष्टितबाट भूजडित बनाउन प्रतिवद्ध रहेको स्पष्ट भएको जानकारी दिए ।
प्रधानमन्त्री ओलीसँगै पूर्वउपप्रधानमन्त्री पूर्णबहादुर खड्का, मन्त्रीहरू रघुजी पन्त र बद्रीप्रसाद पाण्डे, सांसद छविलाल विश्वकर्मा, परराष्ट्र सचिव राईसहित नेपाली प्रतिनिधि मण्डल सहभागी थियो । भ्रमण क्रममा ओलीले चीनका उपराष्ट्रपति हान चङ्ग र शिखर सम्मेलनमा उपस्थित विभिन्न राष्ट्रका प्रमुखहरूसँग पनि भेटवार्ता गर्ने कार्यक्रम छ ।