काठमाडौं, २०८२, शनिबार । कर्मचारीबीच भाइचारा र एकता प्रवर्द्धन गर्ने उद्देश्यले स्थापित ‘मित्र मिलन कर्मचारी नेपाल’ले आफ्नो पहिलो साधारणसभा एवं सम्मान कार्यक्रम सफलतापूर्वक सम्पन्न गरेको छ । काठमाडौं जिल्ला अदालतको सभाहलमा आयोजित उक्त कार्यक्रमले कर्मचारीको हकहित र सामाजिक सुरक्षाका विषयमा जोड दिएको छ ।
सभाको अध्यक्षता गर्दै संस्थाका अध्यक्ष कृष्ण भण्डारीले ‘मित्र मिलन’ विशुद्ध गैरनाफामूलक संस्था भएको र यो कुनै राजनीतिक दल वा ट्रेड युनियनसँग आबद्ध नरहने स्पष्ट पारेका छन् । उनले अन्यायमा परेका ज्यालादारी, करार, अस्थायी र स्थायी सबै कर्मचारीको दुःखमा साथ दिने यो नै एक मात्र संस्था भएको दाबी गरे । भण्डारीले कर्मचारीबीच जन्म र मृत्यु जस्ता सुखदुःखमा सारथी बन्नुपर्नेमा जोड दिए ।
कार्यक्रमका प्रमुख अतिथि पूर्व महालेखा परीक्षक टंकमणि शर्मा दगालले ‘मित्र मिलन’ जस्तो संस्थाको आवश्यकतामा जोड दिए । उनले सरकारी सेवाबाट अवकाश लिएपछि कर्मचारीको जीवनको अन्त्य नभई नयाँ जीवनको सुरुवात हुने बताए । ‘समयभन्दा बलवान् अरू केही छैन,’ उनले भने, ‘अबको समय घरपरिवारलाई पनि दिनुपर्छ।’ आफ्नो ४५ वर्षको निजामती सेवा अनुभव सुनाउँदै शर्माले कर्मचारीले आफ्नो पहिचान आफैं बनाउनुपर्ने र न्यायोचित ढंगले काम गर्नुपर्नेमा जोड दिए ।
यस अवसरमा न्याय सेवा तालिम केन्द्रका तालिम प्रमुख शम्भुराज रेग्मी, सिन्धुपाल्चोक जिल्ला अदालतका श्रेष्तेदार प्रेम प्रसाद पौडेल, काठमाडौं जिल्ला अदालतका श्रेष्तेदार तीर्थराज भट्टराई लगायतका अतिथिहरूले शुभकामना मन्तव्य राख्दै संस्थाको प्रगतिको कामना गरे । उनीहरूले ‘मित्र मिलन’लाई कर्मचारीको साझा मञ्चका रूपमा विकास गर्नुपर्ने धारणा राखे ।
कार्यक्रममा संस्थाले सेवामा भएका नरबहादुर थापा, तीर्थराज भट्टराई, श्याम परियार, दीपक केसी, यमकुमारी राई  र निवृत्त भएका रुक्मा लामिछाने लगायत ७ जना कर्मचारीलाई सम्मान गरेको थियो ।
यसैगरी, साधारणसभाले संस्थाको विधान २०८१ को दफा १३ बमोजिम कृष्ण भण्डारीको अध्यक्षतामा १७ सदस्यीय नयाँ कार्यसमिति निर्विरोध निर्वाचित गरेको छ। समितिको उपाध्यक्षमा देवीप्रसाद दाहाल, सचिवमा पुष्पबहादुर बस्नेत र कोषाध्यक्षमा भगवती कार्की रहेका छन् भने सदस्यहरू अर्जुन प्रसाद सिग्देल,बाबुराम शर्मा, राम बहादुर गुरुङ, तेज नारायण श्रेष्ठ, बुद्धि बहादुर खत्री, गिरी बहादुर कोइराला, चिरन्जिवी नेपाल, गोकुल बहादुर घिमिरे, सुरेन्द्र बहादुर खत्री, अम्बिकादेवी पौडेल, सङ्गिता श्रेष्ठ, दिपक कुमार राना, अशोक श्रेष्ठ रहेका छन । निर्वाचन समितिले सर्वसम्मत नयाँ कार्यसमिति निर्वाचित भएको घोषणा गरेको हो ।
सभामा वक्ताहरुले मित्र मिलन कर्मचारी नेपाललाई राजनीति भन्दा माथि उठेको, गैरनाफामूलक संस्था भएको स्पष्ट पारेका थिए । अध्यक्ष भण्डारीले संस्था कर्मचारीका हकहित र दुःख–सुखमा सहकार्य गर्ने उद्देश्यले स्थापना भएको बताए । उनले “यो संस्था कुनै ट्रेड यूनियन नभई, जन्मदेखि मृत्युसम्म कर्मचारीको साथी बन्ने साझा परिवार हो” भन्नेमा जोड दिए ।
कार्यक्रममा विभिन्न अतिथिहरूले संस्थाप्रतिको आस्था र शुभकामना प्रकट गरेका थिए । शम्भुराज रेग्मीले कर्मचारी सरुवा–बढुवामा हुने राजनीतिक हस्तक्षेपबारे पीडा पोख्दै कर्मचारीलाई निष्पक्ष र इमानदार भएर काम गर्नुपर्नेमा जोड दिए । बाबुराम भट्टराईले यस संस्थाले कर्मचारीलाई साझा मञ्च उपलब्ध गराएकोमा आभार व्यक्त गरेका थिए ।