इन्द्रेणीपोष्ट
थियानजिन चीन, १६ भदौ । शाङ्घाई सहयोग संगठन एससिओ प्लस को शिखर सम्मेलनका क्रममा प्रधानमन्त्री केपी शर्मा ओली र लाओ जनप्रजातान्त्रिक गणतन्त्रका राष्ट्रपति थोल्ङलौन सुसौलिथबीच चीनको थियानजिनमा दुईपक्षीय भेटवार्ता भएको छ ।
भेटवार्तामा दुई देशबीचको आपसी सम्बन्ध र सहयोगका विभिन्न पक्षबारे विचारविमर्श गरिएको थियो । नेपाल–लाओबीचको कूटनीतिक तथा मैत्रीपूर्ण सम्बन्धलाई अझ सुदृढ बनाउन सहयोग गर्ने विषयमा पनि छलफल भएको भेटमा सहभागी एक अधिकारीले बताए ।
भेटमा पूर्व उपप्रधानमन्त्री एवं प्रतिनिधिसभा सदस्य पूर्णबहादुर खड्का, शिक्षा, विज्ञान तथा प्रविधि मन्त्री रघुजी पन्त, संस्कृति, पर्यटन तथा नागरिक उड्डयन मन्त्री बद्रीप्रसाद पाण्डे, पूर्वमन्त्री तथा प्रधानमन्त्रीका आर्थिक सल्लाहकार डा.युवराज खतिवडा, पूर्वमन्त्री एवम् सांसद छविलाल विश्वकर्मा र परराष्ट्र सचिव अमृतबहादुर राईलगायत उपस्थित थिए ।
चीनको थियानजिन मेइजियान सम्मेलन केन्द्रमा आइतबारबाट सुरु भएको उक्त सम्मेलनमा प्रधानमन्त्री ओलीसहित सहभागी मुलुकका राष्ट्रप्रमुख तथा सरकार प्रमुखले आज सम्बोधन गर्ने कार्यक्रम छ ।
बिहीबार , भदौ १९ गते २०८२
Sep 04 2025 Thursday
