इन्द्रेणीपोष्ट
काठमाडौं । मान्यजनको हातबाट दशैँको टीका लगाउन जानेहरू बढेसँगै काठमाडौं उपत्यकामा पुनः चहलपहल बढ्न थालेको छ । शुभ साइतमा घरमा टीका लगाएर आफन्तकोमा जाने क्रम बढेसँगै काठमाडौं उपत्यकाका सडकमा मानिसहरूको चहलपहल बढ्न थालेको हो ।
विजया दशमीका दिन रातो टीका र पहेँलो जमरा लगाएर देशभर हर्षोल्लासका साथ विजया दशमी मनाउने चलन छ । घटस्थापनाका दिन राखिएको जमरा आज दुर्गादेवीको प्रसादको रूपमा लगाउने गरिन्छ ।
असत्यमाथि सत्य र आसुरिक शक्तिमाथि दैविक शक्तिले विजय पाएको दिनको रूपमा विजया दशमी मनाउने गरिन्छ । आज ठुलो सदस्यहरूबाट टीका तथा जमरा लगाइने चलन छ ।
आम सर्वसाधारणहरू बडा दशैँ मनाउन काठमाडौंबाट गाउँ फर्किएसँगै महाष्टमीदेखि सुनसान रहेको काठमाडौंमा पुनः चहलपहल बढ्न थालेको हो ।
