इन्द्रेणीपोष्ट
उत्तर कोरियाले मंगलबार पुनः कम्तीमा एक ब्यालेस्टिक मिसाइल परीक्षण गरेको छ । दक्षिण कोरिया र जापानले बताएअनुसार उत्तर कोरियाले पूर्वी क्षेत्रको समुद्रमा मिसाइल परीक्षण गरेको हो ।
स्थानीय समयअनुसार बिहान सवा १० बजे पहिचान नखुलेको ब्यालेस्टिक मिसाइल परीक्षण गरिएको दक्षिण कोरियाको ज्वइन्ट चिफ्स अफ स्टाफले बताएको छ ।
बीबीसीका अनुसार दक्षिण कोरिया, जापान र अमेरिकी गुप्तचर संस्थाका प्रमुखबीच उत्तर कोरियाको विषयमा बैठकको समाचार सार्वजनिक भएसँगै उत्तर कोरियाले ब्यालेस्टिक मिसाइल परीक्षण गरेको हो ।
रोयटर्सका अनुसार जापानका प्रधानमन्त्री फुमिओ किसिडाले उत्तर कोरियाले दुई ब्यालेस्टिक मिसाइल परीक्षण गरेको बताएका छन् । किसिडाले उत्तर कोरियाले पछिल्लो समय श्रृङ्खलाबद्ध मिसाइल परीक्षण खेदजनक रहेको बताएका छन् ।
अमेरिका र दक्षिण कोरियाले उत्तर कोरियालाई वार्तामा बस्न र न्युक्लियर हतियारको कार्यक्रम त्याग्न प्रेरित गर्दै आएका छन् । यद्यपि पछिल्लो समय उत्तर कोरियाले श्रृङ्खलाबद्धरुपमा मिसाइल परीक्षण गर्दै आएको छ ।
संयुक्त राष्ट्रसंघले उत्तर कोरियालाई ब्यालेस्टिक मिसाइल परीक्षणमा रोक लगाएको छ ।
