इन्द्रेणीपोष्ट
धनगढी । बझाङको थलारा गाउँपालिका–४ दिख्ला गाउँमा मंगलबार विहान ४ बजे पहिरो जाँदा एकै परिवारका १८ सहित २३ जना वेपत्ता भएको विषयमा यथार्थ पत्ता लगाउन नेपाली सेनाको हेलिकोप्टर परिचालन हुने भएको छ ।
यस्तै गरेर बैतडीको सिगास गाउँपालिका– ५ ढुंगाडस्थित सेती नदी किनारमा रहेका १० घरका ६० जना पनि उद्धारको पर्खाइमा रहेको वडाअध्यक्ष रामबहादुर धामीले बताए । सो क्षेत्रमा समेत हेलिकोप्टर जाने सुदूरपश्चिम प्रदेश सरकारका आन्तरिक मामिला तथा कानूनमन्त्री एवम् प्रवक्ता पूर्णा जोशीले बताए ।
आइतबार, सोमबार र मंगलबारका तुलनामा बुधबार विहानैदेखि आकाश खुलेकोले उद्धार कार्य गर्न सहज हुने अनुमान गरिएको छ । मंगलबार रातिपछि पानी पनि परेको छैन ।
सुदूरपश्चिम प्रदेश प्रहरी कार्यालयका वरिष्ठ प्रहरी उपरीक्षक तथा प्रवक्ता विक्रमबहादुर चन्दका अनुसार पहिरो गएर गाउँबासी वेपत्ता भएको अपुष्ट खबर आएपछि तीन तिरबाट प्रहरी परिचालन गरिएको छ ।
