इन्द्रेणीपोष्ट
काठमाडौं । बझाङमा पहिरोले गाउँ पुरिदा बेपत्ता भएका २३ जनाको उद्धारको लागि हेलिकप्टर चैनपुर पुगेको छ । भर्खरै नेपाली सेनाको हेलिकप्टर देउलेक विमानस्थलमा अवतरण भएको हो ।
अब केही छिनमा प्रभावित क्षेत्रमा गएर बेपत्ता भएकाको खोजी गर्ने सुदूरपश्चिम प्रदेशका आन्तरिक मामिला तथा कानून मन्त्री पूर्णा जोशीले जानकारी दिइन् ।
पहिला बेपत्ताको खोजी कार्य गर्ने हो, त्यसपछि बिस्थापित भएकालाई राहत दिने काम गर्ने हो, उनले भनिन् । बाढीको बीचमा फसेकाहरुलाई पनि हेलिकप्टरबाटै उद्धार गर्ने तयारी भइरहेको उनले बताइन् ।
मंगलबार दिउँसो थलारा गाउँपालिका–४ डिख्लामा गाउँमाथि पहिरो खस्दा उनीहरू बेपत्ता भएका थिए । उद्धार टोली अहिलेसम्म घटनास्थल पुगेको छैन ।
स्थानीय शिक्षक मदन साउदले २४ घन्टा बितिसक्दा पनि उद्धार टोली नआएको गुनासो गरेका छन् ।
