इन्द्रेणीपोष्ट
काठमाडौं । त्रिभुवन अन्तर्राष्ट्रिय विमानस्थलबाट एक किलो १५५ ग्राम सुनसहित तीन जनालाई पक्राउ गरेको छ ।
बिहीबार हिमालय एयरलाइन्स र एयर अरेबियाको विमानमार्फत दुबईबाट आएका रौतहटको गौर नगरपालिका-१० का ३२ वर्षीय सुनील कुमार साह, मकवानपुरको मनहरी-७ का २८ वर्षीय नवराज परियार र सिन्धुपाल्चोकको भोटेकोशी गाउँपालिका-३ का ३९ वर्षीय दावा छिरिङ शेर्पालाई प्रहरीले पक्राउ गरेको हो ।
त्रिभुवन विमानस्थल सुरक्षा कार्यालयले विमानस्थलको आगमन टनेल गेटबाट पक्राउ परेका उनीहरूको साथबाट प्रहरीले एक किलो १५५ ग्राम सुन र पाँचवटा मोबाइल बरामद गरेको छ ।
प्रहरीले साहको साथबाट चारवटा आईफोन १३ प्रो म्याक्स मोबाइल, एक थान सुनको बेरुवा औँठी र १५० ग्रामको सुनको सिक्री बरामद गरेको छ । यस्तै परियारको साथबाट एउटा आईफोन र सुनको दुईवटा बेरुवा औंठी बरामद गरिएको प्रहरीले जनाएको छ ।
प्रहरीका अनुसार एयर अरेबियामार्फत सारजहाबाट आएका शेर्पाको साथबाट बेलनाकार बनाइएको अर्धठोस एक किलो ५५ ग्राम सुन मलद्वारभित्र लुकाएर ल्याएको अवस्थामा फेला पारिएको थियो ।
