काठमाडौँ, १४ भदौः नेपाल कम्युनिष्ट पार्टी माओवादी केन्द्र का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ ले जनताको सङ्घर्षबाट प्राप्त उपलब्धि रक्षाका लागि सबै राजनीतिक दल र समुदाय एकजुट हुनुपर्नेमा जोड दिएका छन ।
नेपाल दलित मुक्ति मोर्चाद्वारा आयोजित ‘नेपालमा दलित अधिकारको अवस्था, नीतिको विकास र कार्यान्वयनमा चुनौती’ विषयक गोष्ठीलाई सम्बोधन गर्दै अध्यक्ष दाहालले संवैधानिक अधिकार संरक्षणका लागि दलित समुदायसहित सबै राजनीतिक दल र नागरिक समाजको आपसी सहकार्य आवश्यक रहेको बताए ।
उनले संविधानको प्रस्तावना, धारा २४ र ४० मा उल्लेख गरिएका दलित अधिकारको प्रभावकारी कार्यान्वयनका लागि दलित समुदायले सडक, संसद् र पार्टीमार्फत दबाब सिर्जना गर्नुपर्ने आवश्यकता औँल्याए । साथै, राज्यका अङ्ग र निकायमा जनसङ्ख्याका आधारमा समानुपातिक प्रतिनिधित्व सहित निश्चित प्रतिशत थप गर्नुपर्ने धारणा व्यक्त गरे ।
दाहालले क्षतिपूर्ति सहित दलित समुदायलाई विशेष अधिकार दिन संविधान संशोधन आवश्यक रहेको उल्लेख गर्दै आफ्नो पार्टीले दलित मुक्तिका लागि स्पष्ट नीति अघि सारेको दाबी समेत गरे ।
यस्तै, मोर्चाका अध्यक्ष दलजित श्रीपाइलीले संविधानको धारा ४० कार्यान्वयनसहित समानुपातिक प्रतिनिधित्व सुनिश्चित गर्न निर्वाचन प्रणालीमै परिवर्तन गर्नुपर्ने माग गरे । उनले प्रत्यक्ष निर्वाचनमा दलित र महिलाका लागि अलग निर्वाचन क्षेत्र वा जनसङ्ख्याका आधारमा अनिवार्य प्रतिनिधित्व हुने व्यवस्था गर्नुपर्नेमा जोड दिएका थिए ।
दलित समुदायले पालिका प्रमुख तथा उपप्रमुख देखि वडाध्यक्षसम्म अनिवार्य प्रतिनिधित्व हुने व्यवस्था गर्न स्थानीय तह निर्वाचन कानुन संशोधन गर्नुपर्ने मागसमेत राखेको छ ।