इन्द्रेणीपोष्ट
गलकोट बागलुङ, १२ भदौ – सरकारले एक सय पर्यटकीय गन्तव्यमा समावेश गरेको बागलुङको गाजादहमा २३ फिट अग्लो सिद्धबराहको पूर्णकद मूर्ति निर्माण भएको छ । चार महिनामा मूर्तिकार कृष्ण बहादुर सुनारले तयार गरेको मूर्ति निर्माणमा रु. २० लाख खर्च भएको छ ।
समुद्र सतहबाट २५०० मिटरको उचाइमा रहेको जैमिनी नगरपालिका–३ को गाजादह धार्मिक तथा पर्यटकीय क्षेत्रका रूपमा विकास गर्दै, सिद्धबराहको प्रचारप्रसार गर्ने उद्देश्यले यो मूर्ति स्थापना गरिएको वडाध्यक्ष कृष्णबहादुर भुजेलले जानकारी दिए ।
भगवान विष्णुको दश अवतारमध्ये तेस्रो बराह अवतार झल्काउने गरी मूर्ति निर्माण गरिएको हो । स्थानीय प्रशासन र समुदायको पहलमा ताल संरक्षण, मन्दिर निर्माण र पूर्वाधार विकास पनि भएको छ । गाजादह २४ वर्गमिटर क्षेत्रमा फैलिएको यस क्षेत्रलाई धार्मिक पर्यटकका लागि प्रमुख गन्तव्यका रूपमा विकास गर्ने योजना अघि बढाइँदैछ ।
आइतबार, भदौ १५ गते २०८२
Aug 31 2025 Sunday
