इन्द्रेणीपोष्ट
नवलपुर, १२ भदौः देवचुली नगरपालिका–१७ मा सुविधासम्पन्न ट्रमा सेन्टर निर्माणको काम धमाधम सुरु भएको छ । गत असार ३० गते सुरु भएको यस निर्माण कार्य १८ महिनामा सम्पन्न हुने लक्ष्यसहित अगाडि बढिरहेको छ ।
सघन सहरी तथा भवन निर्माण आयोजना चितवनका सूचना अधिकारी इन्जिनियर द्रोण मानदेव कटुवालका अनुसार, रु १० करोड ३५ लाखमा मूल्य अभिवृद्धि कर भ्याटसहित निर्माणको काम चितवनको बिबिएस जेभीले गरिरहेको छ । हाल जग खन्ने, डन्डी झार्ने र फाउन्डेसन तयार गर्ने काम भइरहेको छ भने केही दिनमा जग ढलानको काम सुरु हुने उनले जानकारी दिएका छन ।
वातावरणीय प्रभाव मूल्याङ्कन इआइए अनुसार ६४६ वटा रूख, पोल कटान गर्नुपर्ने देखिएकाले मन्त्रिपरिषद्बाट अनुमति प्राप्त भएपछि काम अगाडि बढाइएको छ । हाल भवन निर्माण हुने क्षेत्रमा मात्रै रूख काटेर काम भइरहेको छ ।
साइट इन्जिनियर अविशेककुमार चौरसियाका अनुसार झराही सामुदायिक वनको करिब तीन बिघा क्षेत्रफलमा १५ शय्या क्षमताको साढे दुई तलाको भवन बनाइँदैछ । भुइँतल्लामा बिरामी उपचार, पहिलो तल्लामा प्रशासन, बहुउद्देश्यीय सभाकक्ष र अस्पताल वार्ड तथा माथिल्लो तल्लामा कर्मचारी आवास रहनेछ । अस्पतालमा एक्स–रे कक्ष, अपरेसन थिएटर र प्रयोगशालाका कोठाहरू निर्माण गरिनेछ ।
पूर्व–पश्चिम राजमार्ग नजिकै निर्माण भइरहेको ट्रमा सेन्टरले नवलपुर र छिमेकी जिल्लामा हुने दुर्घटनाका बिरामीलाई लाभ पुग्ने जनाइएको छ ।
आइतबार, भदौ १५ गते २०८२
Aug 31 2025 Sunday
