इन्द्रेणीपोष्ट
विराटनगर, १३ भदौ । कोशी प्रदेश सरकारले साना तथा मझौला व्यवसाय प्रवद्र्धन र उद्यमशीलताको विकासका लागि स्विस सरकारको सहयोगमा ‘उदय परियोजना’ सुरु गरेको छ । चार वर्षे पहिलो चरणमा सञ्चालन हुने यस परियोजनाबाट झण्डै तीन हजार रोजगारी सिर्जना हुने अपेक्षा गरिएको छ ।
परियोजनाअन्तर्गत रु ६० करोडको ग्यारेन्टी फन्डमार्फत रु आठ अर्ब बराबरको कर्जा सुरक्षा गरिनेछ भने रु २८ करोडको ‘च्यालेञ्ज फन्ड’मार्फत प्रतिस्पर्धात्मक क्षमता अभिवृद्धि गरिनेछ । बिना धितो रु ३० लाखदेखि तीन करोडसम्मको कर्जा उपलब्ध गराउने व्यवस्था गरिएको छ ।
परियोजना कोशी प्रदेशका सबै १४ जिल्लामा विस्तार गरिने र साना तथा मझौला उद्योगलाई प्रवद्र्धन गर्दै नयाँ उद्योग स्थापनामा प्रोत्साहन गर्ने लक्ष्य लिएको छ ।
मुख्यमन्त्री हिक्मतकुमार कार्कीले यो परियोजनाले प्रदेशलाई आर्थिक समृद्धितर्फ अग्रसर गराउने उल्लेख गर्दै यसलाई नमूनाका रूपमा देशव्यापी उदाहरण बनाउन प्रतिवद्धता जनाएका छन ।
आइतबार, भदौ १५ गते २०८२
Aug 31 2025 Sunday
