इन्द्रेणीपोष्ट
काठमाडौँ, २७ साउनः प्रधानमन्त्री केपी शर्मा ओलीले भूमि समस्या समाधान आयोगलाई सबै भूमिहीनलाई लालपुर्जा दिलाएर इतिहास रच्न आग्रह गरेका छन । वर्तमान सरकार स्थिर भएकाले आयोगले ढुक्कका साथ काम गर्न सक्ने विश्वास व्यक्त गर्दै उनले दुई साताभित्र सबै जिल्लाका आयोगहरू पूर्ण रूपमा सक्रिय हुन निर्देशन दिएका छन ।
प्रधानमन्त्री ओलीले भने, “यो आयोग विगतझैं काम नगर्न गठन गरिएको छैन, परिणाम निकाल्न र भूमिहीनलाई राहत दिन गठन गरिएको हो।” उनले अव्यवस्थित बसोबासी र भूमिहीनलाई जमिन पाउनुपर्ने बताउँदै आवश्यक परे सरकार कानुन संशोधनमा पनि सहयोग गर्ने प्रतिबद्धता व्यक्त गरेका छन ।
गोष्ठीमा गृहमन्त्री रमेश लेखकले सबैलाई संवैधानिक हकअनुसार लालपुर्जा दिलाउन सरकार प्रतिबद्ध रहेको बताएका छन भने, भूमि व्यवस्था मन्त्री बलराम अधिकारीले आयोगको कानुनी तर्जुमासहित काम तीव्र बनाइएको जानकारी दिए ।
आयोगका अध्यक्ष हरिप्रसाद रिजालले दलित, सुकुम्बासी र अव्यवस्थित बसोबासीको पहिचान, प्रमाणीकरण, नाप नक्सा, विवाद समाधान र लालपुर्जा वितरणको योजना तीन तहको सरकारसँग सहकार्यमा अगाडि बढेको जानकारी दिएका छन ।
प्रधानमन्त्रीले स्वार्थ समूहको प्रभावबाट बच्दै बदनाम नहुनेगरी काम गर्न आयोगलाई निर्देशन समेत दिएका छन ।
बुधबार, साउन २८ गते २०८२
Aug 13 2025 Wednesday
