काठमाडौँ, ८ भदौ । लामो समयदेखि नेपाली चलचित्र क्षेत्रमा सक्रिय निर्देशक ऋषि लामिछानेले ८ वर्षको अन्तरालपछि आफ्नो नयाँ चलचित्र माग्ने राजा सार्वजनिक गरेका छन् । यो चलचित्र निर्देशक लामिछानेको व्यक्तिगत सपना र लामो संघर्षको कथा रहेको बताइएको छ ।
फिल्म निर्माणका क्रममा थुप्रै चुनौतीहरूको सामना गरेको कुरा स्मरण गर्दै लामिछानेले भने, कहिले आँसु झर्ने अवस्था आयो, कहिले असफलताको डरले मन भारी भयो । तर, मैले विश्वास गुमाइनँ । एक दिन दर्शकलाई छुने कथा जन्मिन्छ भन्ने दृढ विश्वासले नै आज मलाई माग्ने राजा बनाउने हिम्मत दियो ।
रिलिज अघि नै यो फिल्मले व्यापक चर्चा पाइसकेको थियो । यसको टिजर र ट्रेलरले युट्युबमा लाखौँ भ्युज पाएका छन् भने म त सुतेर उठेको पैसामा बोलको गीत सामाजिक सञ्जालमा भाइरल भएको छ ।
फिल्म हेरेका दर्शकले यसलाई केवल हास्यप्रधान मात्र नभई जीवनको वास्तविकता देखाउने सशक्त चलचित्रको रूपमा प्रतिक्रिया दिएका छन् । कतिपयले यसलाई हाँस्दै हाँस्दै आँसु झार्ने कथा भनेका छन् भने अरूले यो फिल्मले हाम्रो समाजको वास्तविक परिवेशलाई निकै नजिकबाट देखाएको छ भन्दै प्रशंसा गरेका छन् ।
निर्देशक लामिछानेले दर्शकलाई हलमा पुगेर आफ्नै फिल्मझैँ अनुभव गर्न आग्रह गर्दै भनेका छन्, यो फिल्म मेरो मात्र नभई हामी सबैको कथा हो । तपाईंहरू हलमा आउनुहोस् र आफ्नै जीवनसँग जोडिएको अनुभव गर्नुहोस् ।
हाल देशभरका सिनेमा हलहरूमा प्रदर्शनमा आएको माग्ने राजाु ले राम्रो व्यावसायिक सम्भावना देखाएको छ । लामो प्रतीक्षापछि आएको यस फिल्मले नेपाली चलचित्र क्षेत्रमा नयाँ उत्साह जगाउने अपेक्षा गरिएको छ ।