इन्द्रेणीपोष्ट
काठमाडौँ, १२ भदौ । मानव बेचबिखन तथा ओसारपसार मुद्दामा इन्टरपोलमार्फत रेड नोटिस जारी गरिएका फरार प्रतिवादी सुर्खेत भेरीगङ्गा नगरपालिका–२, सप्तरी समाझिङ्घाका कृष्ण सुनारलाई कुवेतमा पक्राउ गरिएको छ । कुवेतको राष्ट्रिय अपराध अनुसन्धान विभागसँगको समन्वयमा पक्राउ परेका उनलाई बुधबार नेपाल ल्याइएको केन्द्रीय प्रहरी समाचार कक्षले जनाएको छ ।
प्रहरीका अनुसार सुनार लामो समयदेखि मानव बेचबिखनसम्बन्धी मुद्दामा फरार सूचीमा थिए । उनलाई इन्टरपोलमार्फत अन्तर्राष्ट्रिय स्तरमा खोजतलास गरिएको थियो । सोही क्रममा कुवेत प्रहरीसँगको सहकार्यमा पक्राउ गर्न सफलता मिलेको हो ।
सुनारलाई कानूनी प्रक्रियाअनुसार सुर्खेत जिल्ला प्रहरी कार्यालयमा बुझाइने प्रहरीले जनाएको छ । त्यहाँबाट सम्बन्धित अदालतमा पेश गरी मुद्दाको कानूनी प्रक्रिया अघि बढाइनेछ ।
नेपाल प्रहरीले पछिल्ला वर्षहरूमा अन्तर्राष्ट्रिय प्रहरी संगठन इन्टरपोल सँग सहकार्य गर्दै मानव बेचबिखन, ठगी, ओसारपसार र अन्य गम्भीर अपराधमा संलग्न फरार अभियुक्तलाई पक्राउ गर्ने अभियानलाई तीव्र पारेको छ । यसअघि पनि विभिन्न देशमा लुकेर बसेका अभियुक्तहरू पक्राउ गरी नेपाल ल्याइएका उदाहरणहरू छन् ।
प्रहरीका अधिकारीहरूले अन्तर्राष्ट्रिय अपराध नियन्त्रणका लागि राष्ट्रबीचको सहकार्य अत्यन्तै जरुरी रहेको उल्लेख गर्दै यस्ता गिरफ्तारीहरूले अपराधीलाई कुनै पनि मुलुकमा सुरक्षित आश्रय नहुने सन्देश दिने बताएका छन् ।
आइतबार, भदौ १५ गते २०८२
Aug 31 2025 Sunday
