इन्द्रेणीपोष्ट
पर्वत, १७ भदौ – विहादी गाउँपालिकाले लोपोन्मुख स्थानीय जातका गाई र हलगोरु पाल्ने किसानलाई प्रोत्साहनका लागि अनुदान वितरण गर्ने भएको छ। व्यावसायिक दूध उत्पादनका लागि उन्नत जातका गाई पाल्ने किसानलाई प्रतिगाई रु २० हजार र स्थानीय जातका गाईको सुत्केरीमा रु २ हजार ५०० अनुदान प्रदान गरिने छ । हलगोरु पाल्ने किसानलाई प्रतिहलगोरु रु १० हजार उपलब्ध गराइने जानकारी प्रमुख प्रशासकीय अधिकृत थमनबहादुर रेश्मीले दिए ।
गाउँपालिकाले पालिका भित्रका छवटै वडामा स्थानीय जातका गाईपालक किसानलाई विगत तीन वर्षदेखि प्रोत्साहन गर्दै आएको छ । यस वर्ष गाई संरक्षण अभियान अन्तर्गत निवेदन, वडा कार्यालयको सिफारिस, नागरिकताको प्रतिलिपि र गाई बाछीको तस्बिर संलग्न गरी आवेदन दिनुपर्ने व्यवस्था गरिएको छ ।
विहादी गाउँपालिका अध्यक्ष परवीन गुरुङका अनुसार, स्थानीय जातका गाईको संरक्षण नगरेमा हिन्दू पूजापाठ र धर्मावलम्बी नयाँ पुस्ताको लागि गाईको पहिचान हराउन सक्ने खतरा छ । पालिकाले चालु आर्थिक वर्षमा सुत्केरी भएका स्थानीय गाईलाई अनुदान दिने तयारी गरेको छ ।
अघिल्ला वर्षमा विहादीले रु पाँच–पाँच हजारका दरले प्रोत्साहन उपलब्ध गराएको थियो । पर्वतका अन्य पालिकाहरू पनि हलगोरु, राँगो र गाईपालनमा किसानलाई अनुदान दिँदै व्यावसायिक कृषि पेशातर्फ आकर्षित गर्दै आएका छन् । भेटेरिनरी अस्पताल तथा पशु सेवा विज्ञ केन्द्रले यस वर्ष गाईभैँसीको सुत्केरी खर्चका लागि रु १० लाख विनियोजन गरेको छ ।
शुक्रबार, भदौ २० गते २०८२
Sep 05 2025 Friday
