इन्द्रेणीपोष्ट
काठमाडौँ, १८ भदौः भाषा आयोगले सवारी साधनमा जडान हुने विद्युतीय सङ्केत इम्बोस्ड नम्बर प्लेट अनिवार्य नेपाली भाषामै हुनुपर्ने माग गरेको छ । नेपालको संविधानको धारा ७ को उपधारा १ अनुसार सरकारी कामकाजको भाषा नेपाली भाषा हुने व्यवस्था रहेको स्मरण गराउँदै आयोगले अंग्रेजी भाषामा नम्बर प्लेट राख्ने प्रावधानप्रति आपत्ति जनाएको हो ।
आयोगले सर्वोच्च अदालतको २०८१ असार ९ गतेको फैसलामा नेपाली भाषाको वर्णविन्यास र संवैधानिक प्रावधानलाई आधार मानेर नम्बर प्लेट नेपाली भाषामै हुनुपर्ने व्याख्या भएको जनाएको छ । संविधानको धारा ७ को उपधारा ३ ले भाषा सम्बन्धी विषयमा आयोगको सिफारिसमा सरकारले निर्णय गर्ने व्यवस्था गरेको आयोगले उल्लेख गरेको छ ।
आयोगका अध्यक्ष डा.गोपाल ठाकुरका अनुसार आयोगले भदौ १ गतेको निर्णयअनुसार देवनागरी लिपीमा विद्युतीय सङ्केत राख्नुपर्ने संवैधानिक दायित्व बोध गर्दै नेपाल सरकारको ध्यानाकर्षण गराएको छ । आयोगले सबै तहका सरकारलाई संविधानअनुसार व्यवस्था कार्यान्वयन गर्न आग्रह गरेको छ ।
बुधबार, भदौ १८ गते २०८२
Sep 03 2025 Wednesday
