सिन्धुलीमा ट्रकको ठक्करबाट पैदलयात्रीको मृत्यु

कमलामाई सिन्धुली, २० भदौः सिन्धुलीको कमलामाई नगरपालिका–९ बथानचौडी नजिक मदन भण्डारी राजमार्गमा आज बिहान भएको सवारी दुर्घटनामा एक पैदलयात्रीको ज्यान गएको छ भने अर्का एक जना घाइते भएका छन् ।
जिल्ला प्रहरी कार्यालय सिन्धुलीका प्रमुख प्रहरी उपरीक्षक लालध्वज सुवेदीका अनुसार विराटनगरबाट काठमाडौँतर्फ जाँदै गरेको ट्रकले बाटोमा हिँडिरहेका भुवन भुजेल र टेकप्रसाद दाहाललाई ठक्कर दिएको थियो । ठक्करबाट भुजेलको घटनास्थलमै मृत्यु भएको छ भने दाहालको स्थानीय अस्पतालमा उपचार भइरहेको छ ।
प्रहरीका अनुसार बटुवालाई ठक्कर दिएपछि ट्रक अनियन्त्रित भई सडक किनारको घरमा ठोक्किँदा गारो ढलेको छ । दुर्घटनामा घरपालुवा करिब २० वटा पन्छीको मृत्यु भएको पनि जनाइएको छ ।
दुर्घटनापछि ट्रक र चालकलाई प्रहरीले नियन्त्रणमा लिएको छ भने थप अनुसन्धान भइरहेको प्रहरीले जनाएको छ ।