इन्द्रेणीपोष्ट
काठमाडौं । फाइजर कम्पनीले अमेरिकाका ५ देखि ११ वर्ष उमेर समूहका बालबालिकालाई कोरोना भाइरस विरुद्धको खोपको आपतकालिन प्रयोगको अनुमति माग गरेको छ ।
आफूले उत्पादन गरेको खोप बालबालिकाको लागि प्रभावकारी देखिएको दाबी गर्दै फाइजरले यस्तो अनुमति माग गरेको हो । फाइजरले बालबालिकामा खोपको आपत्कालीन प्रयोगका लागि अमेरिकाको खाद्य एवं औषधि प्रशासन (एफडीए)सँग अनुमति माग गरेको अन्तर्राष्ट्रिय सञ्चारमाध्यमले उल्लेख गरेका छन् ।
फाइजरका वरिष्ठ उपाध्यक्ष डा.बिल ग्रबरले परीक्षणबाट खोप प्रभावकारी देखिएको बताए । ‘दोस्रो डोज खोप लगाइसकेपछि पाँच देखि ११ वर्ष उमेर समूहका बालबालिकामा कोरोनासँग लड्न सक्ने एन्टीबडीको विकास भएको हामीले पाएका छौँ,’ उनले भने, ‘यो खोप सुरक्षित भएकाले बालबालिकालाई ढुक्कसँग लगाउन सकिने छ ।’
यसअघि फाइजरले जर्मन बायोएनटेकसँग मिलेर बनाएको खोप १२ वर्षमाथि उमेर समूहका बालबालिकालाई लगाइएको थियो । त्यो खोप बालबालिकामा प्रभावकारी देखिइसकेको छ ।
