इन्द्रेणीपोष्ट
गत जनवरी २ मा जापानको राजधानी टोकियोको हानदा विमानस्थलमा दुई विमान ठोक्किँदा ठूलो दुर्घटना निम्तिएको थियो ।
सो घटना भएको ठीक दुई हप्तापछि जापानमा मंगलबार फेरि दुई विमान एकआपसमा ठोक्किएका छन् ।
होक्काइडोको न्यु चितोस विमानस्थलमा स्थानीय समयअनुसार साढे ५ बजे यो दुर्घटना भएको हो ।
यो घटनामा कुनै हताहती भने भएको छैन । दक्षिण कोरियाली विमान कोरियन एयर र हङकङको क्याथे प्यासिफिकको विमान ठोक्किएका हुन् ।
कोरियन एयरले उडान भर्ने बेलामा क्याथे प्यासिफिककको विमानलाई ठक्कर दिएको हो । त्यसबेला क्याथे प्यासिफिकको विमानमा भने कुनै यात्रु थिएनन् ।
यस घटनापछि आज चितासे विमानस्थलमा कैयौं उडान रद्द गरिएका छन् । १४ दिनअघि हानेदा विमानस्थलमा भएको दुर्घटनामा पाँच जनाको मृत्यु भएको थियो ।
जापान एयरलाइन्सको विमानले तटरक्षक विमानलाई ठक्कर दिएको थियो । दुवै विमानहरू ठोक्किएपछि जलेर पूर्ण रुपमा नष्ट भएका थिए ।
जापान एयरलाइन्सका सबै ३७९ यात्रु बच्दा तटरक्षक विमानका यात्रुको ज्यान गएको थियो ।
