इन्द्रेणीपोष्ट
काठमाडौं असार ३ । शिक्षा, विज्ञान तथा प्रविधि मन्त्रालयले वैदेशिक अध्ययन अनुमति पत्र एनओसीमा भएको बेतिथि बारे अनुसन्धान सुरु गरेको छ ।
शिक्षा मन्त्रालय अन्तर्गतको सानोठिमि स्थिति एनओसी शाखामा घुस लिएर एनओसी दिने गरेको समाचार प्रकाशित भएको थियो । हरेक देश अनुसार फरक फरक घुस रकम लिएर एनओसी बनाउने गरेको पाइएको देखिएको छ । ३० हजारदेखि एक लाख माथिसम्म विद्यार्थीबाट कर्मचारीले असुल्ने गरेको पाइएको छ ।
यो सँगै शिक्षा मन्त्रालयले छानबिन कार्यदल नै गठन गरेर अनुसन्धान सुरु भएको जानकारीमा आएको छ । शिक्षा मन्त्रालयका प्रवक्ता शिवकुमार सापकोटाका अनुसार छानबिन गर्न कार्यदल गठन गरिएको छ । शिक्षा तथा मानव स्रोत विकास केन्द्रका महानिर्देशक कृष्णप्रसाद काप्रीको संयोजकत्वमा पाँच सदस्यीय कार्यदल गठन गरिएको छ ।
शिक्षामन्त्री रघुजी पन्तले निश्पक्ष छानबिन गर्न आदेश दिएका छन् भने
अनियमितता भएको भेटिएमा कार्यदलले कारबाहीको लागि सिफारिस गर्ने छ ।
छानबिन र अनुसन्धान कार्यदललाई एक महिनाको समय दिइएको छ । सेवाग्राहीबाट असुविधा भएको गुनासो आएका छन् । अध्ययन गर्न कार्यदल बनाइएको हो’, प्रवक्ता सापकोटाले भने ।
कार्यदलले एनओसीमा भइरहेको विकृतिबारे अध्ययन अनुसन्धान गरेर नीतिगत सुधारको प्रस्ताव पनि गर्ने छ ।
कार्यदलका संयोजक काप्रीले समितिले काम सुरु गरेको बताए । ‘कार्यदलले काम सुरु गरेको छ’, उनले भने, ‘अनियमितताको विषय पनि उठेको छ । कार्यदलले समग्र अध्ययन गर्छ ।’
