इन्द्रेणीपोष्ट
काठमाडौँ, ७ साउन – हाल देशभर मनसुनी वायुको प्रभाव सक्रिय रहेको जल तथा मौसम पूर्वानुमान महाशाखाले जनाएको छ । महाशाखाका अनुसार मनसुनको न्यून चापीय रेखा सरदर स्थानको आसपास अवस्थित रहेकाले देशभर आंशिकदेखि साधारणतया बदली हुने मौसमको पूर्वानुमान गरिएको छ ।
आज दिउँसो कोशी, बागमती र गण्डकी प्रदेशसहित देशका पहाडी भूभागका केही स्थानहरूमा मेघगर्जन, चट्याङसहित हल्कादेखि मध्यम वर्षाको सम्भावना रहेको छ । बागमती र गण्डकी प्रदेशका एक(दुई स्थानमा भने भारी वर्षा हुने चेतावनी दिइएको छ ।
आज राति पनि देशभर आंशिकदेखि साधारणतया बदली रहने र सबै प्रदेशका केही स्थानमा मेघगर्जन र चट्याङ सहित हल्कादेखि मध्यम वर्षा हुने सम्भावना रहेको महाशाखाले जनाएको छ ।
महाशाखाले सम्भावित भारी वर्षाको कारण खोला, नदीमा पानीको बहाव बढ्न सक्ने, पहिरोको जोखिम हुने तथा सवारी आवागमनमा अवरोध पर्न सक्ने भएकाले आवश्यक सतर्कता अपनाउन आग्रह गरेको छ ।
