इन्द्रेणीपोष्ट
हेटौँडा, १८ साउन – बागमती प्रदेशका मुख्यमन्त्री बहादुर सिंह लामाले पदबाट राजीनामा दिएका छन् । आइतबार आयोजित पत्रकार सम्मेलनमार्फत उनले आफ्नो राजीनामा सार्वजनिक गरेका हुन् ।
लामाले नेपाली कांग्रेसका सभापति शेरबहादुर देउवाको आग्रहपछि राजीनामा दिएको बताएका छन् । “पार्टी सभापति देउवाज्यूसँगको छलफल र पछिल्ला राजनीतिक घटनाक्रमलाई मध्यनजर गर्दै प्रदेश प्रमुख समक्ष राजीनामा बुझाउने निर्णय गरेको छु,” लामाले भने ।
साउन १४ गते नेपाली कांग्रेसको बागमती प्रदेश संसदीय दलको नेतामा ईन्द्रबहादुर बानियाँ २२ मतसहित विजयी भएका थिए । लामाको पक्षमा १५ मत परेको थियो भने एक मत बदर भएको थियो । बागमती प्रदेशसभामा कांग्रेसका ३७ सांसद छन् ।
पहिले दल नेताबाट पराजित भए पनि राजीनामा नदिने अडान लिएका लामाले देउवासँगको छलफलपछि मार्गप्रशस्त गर्ने निर्णय गरेका हुन् । देउवाले दलभित्र सहमति कायम गर्न र नयाँ नेतृत्वलाई अवसर दिन सुझाव दिएका थिए ।
लामाको राजीनापछि बागमतीमा नयाँ सरकार गठनको प्रक्रिया अघि बढ्ने भएको छ ।
आइतबार, साउन १८ गते २०८२
Aug 03 2025 Sunday
