इन्द्रेणीपोष्ट
काठमाडौँ, ७ साउनः नेपाल–चीन सिमानाको ल्हेन्दे खोलामा असार २४ गते आएको बाढीपछि चीनमा फसेका नेपाली नागरिकलाई आज स्वदेश फर्काइने भएको छ । मितेरी पुल बगाएपछि स्वदेश फर्कन नसकेका ती नेपालीलाई सिन्धुपाल्चोक स्थित तातोपानी नाका हुँदै नेपाल ल्याउन लागिएको हो ।
उनीहरूलाई फर्काउनका लागि रसुवाका प्रतिनिधिसभा सदस्य इञ्जिनियर मोहन आचार्यले परराष्ट्रमन्त्री डा.आरजु राणा देउवालाई भेटी आवश्यक कूटनीतिक पहल गर्न आग्रह गरेका थिए । भेटमा सांसद आचार्यले अस्थायी पुल निर्माण, मितेरी पुल पुनःनिर्माण र मौसमसम्बन्धी सूचना आदानप्रदानलगायतका विषयमा सरकारको ध्यानाकर्षण गराएका थिए ।
रसुवामा मितेरी पुल अझै नबनेका कारण बाढीबाट प्रभावित २०३ नेपालीलाई तातोपानी नाका हुँदै स्वदेश ल्याउन लागिएको हो । ती मध्ये केही बिरामी, औषधि सेवन गरिरहेकाहरू तथा सवारी चालकहरू छन् ।
चिनियाँ भूमिमा चीन सरकारले र नेपालतर्फ सरकारले यातायातको व्यवस्था मिलाएको रसुवाका प्रमुख जिल्ला अधिकारी अर्जुन पौडेलले जानकारी दिएका छन । उनका अनुसार स्याफ्रुबेँसी–रसुवागढी सडक सुचारु भए पनि पुल नबनेका कारण वैकल्पिक रूपमा तातोपानी नाका प्रयोग गरिएको हो ।
आइतबार, साउन १८ गते २०८२
Aug 03 2025 Sunday
