काठमाडौँ, ७ साउन — नेपाल नागरिक उड्डयन प्राधिकरण क्यानले आर्थिक वर्ष २०८२।८३ का लागि कुल रु ३१ अर्ब ४० करोड ४७ लाखको बजेट सार्वजनिक गरेको छ। आज काठमाडौँमा आयोजित पत्रकार सम्मेलन मार्फत क्यानले चालु वर्षका योजना तथा प्राथमिकता बारे जानकारी दिएको हो ।
गत वर्षको तुलनामा क्यानको कुल बजेट रु २ अर्ब ७१ करोड घटेको हो । तर, पुँजीगत खर्चतर्फ भने बजेट बढाउँदै रु १२ अर्ब ३९ करोड ७० लाख विनियोजन गरिएको छ, जुन अघिल्लो वर्षको भन्दा झन्डै ९० करोड रुपैयाँले बढी हो ।
सञ्चालन खर्च घटाउँदै, पूर्वाधारमा जोड
क्यानले कार्य सञ्चालनतर्फ रु ६ अर्ब १५ करोड ६७ लाख छुट्याएको छ, जुन अघिल्लो वर्षको तुलनामा केही कम हो । वित्तीय व्यवस्थापनका लागि भने रु १२ अर्ब ८५ करोड १० लाख विनियोजन गरिएको छ ।
आम्दानी बढाउने रणनीति
महानिर्देशक प्रदीप अधिकारीले प्राधिकरणले पुँजीगत खर्च बढाउने र सञ्चालन खर्च घटाउने नीति लिएको बताउँदै, आन्तरिक स्रोत सुदृढीकरणमा जोड दिएका छन । उनका अनुसार विमानस्थल सेवा शुल्क, यात्रु सेवा लगायतका दरहरूमा पुनरावलोकन आवश्यक छ ।
स्रोत खुम्चिंदै, समाधान खोजिँदै
“हरेक वर्ष बजेट घट्दै गएको छ, स्रोत खुम्चिएको अवस्था छ,” अधिकारीले भने, “तर स्रोत व्यवस्थापन र आम्दानी वृद्धि गरी प्राधिकरणको वित्तीय स्थिति मजबुत बनाइनेछ।”
पोखरा र भैरहवामा सक्रियता
महानिर्देशक अधिकारीले भैरहवा र पोखरा अन्तर्राष्ट्रिय विमानस्थललाई प्रभावकारी रुपमा सञ्चालन गर्न संस्थागत र प्रशासनिक पहल चलिरहेको जानकारी दिएका छन ।
निष्कर्षमा, क्यानले बजेट कटौतीका बाबजुद पूर्वाधार निर्माण र सुधारमा प्राथमिकता दिने, साथै आम्दानीका नयाँ स्रोतहरू पहिचान गर्ने रणनीति लिएको छ। यसबाट मुलुकको उड्डयन क्षेत्र थप व्यवस्थित र आधुनिक हुने अपेक्षा समेत गरिएको छ ।