इन्द्रेणीपोष्ट
काठमाडौँ, १० साउनः विभिन्न कारणले इरानको जेलमा थुनिएका पाँच जना नेपाली नागरिक स्वदेश फर्किएका छन् ।
तेहरानस्थित नेपाली अवैतनिक वाणिज्यदूतको समन्वय र अन्तरराष्ट्रिय आप्रवासन सङ्गठन आईओएमको सहयोगमा ती नेपालीलाई फिर्ता ल्याइएको परराष्ट्र मन्त्रालयले जनाएको छ। इरानी अदालतले उनीहरूलाई थुनामुक्त गर्ने आदेश दिएको थियो ।
यसअघि पनि भारतीय विमान सेवाको सहयोगमा तीन चरणमा गरी नौ जना नेपालीलाई इरानबाट उद्धार गरी स्वदेश फिर्ता ल्याइएको थियो । ती उद्धार भारतीय नागरिकका लागि भारत सरकारद्वारा पठाइएका विशेष उडानमार्फत गरिएको थियो ।
गत जुन १३ तारिखदेखि इजरायल र इरानबीच सुरु भएको द्वन्द्व जुन २३ मा युद्धविराम भएपछि शान्तिसुरक्षाको अवस्था सहज हुँदै गएको र त्यसकै अवसरमा नेपालीलाई फिर्ता ल्याउन सम्भव भएको मन्त्रालयको भनाइ रहेको छ।
सरकारले उद्धार प्रक्रियामा सहकार्य, सहयोग र सद्भाव प्रकट गर्ने सम्पूर्ण पक्षप्रति आभार प्रकट गरेको छ ।
आइतबार, साउन १८ गते २०८२
Aug 03 2025 Sunday
