इन्द्रेणीपोष्ट
गुल्मी, २० साउनः लगातारको वर्षापछि आएको पहिरोका कारण कालीगण्डकी करिडोरका तीन खण्डसहित गुल्मीका विभिन्न सडकमा आवतजावत पूर्ण रूपमा रोकिएको छ । जिल्ला प्रहरी कार्यालय गुल्मीका सूचना अधिकारी गङ्गाबहादुर सारुका अनुसार कालीगण्डकी गाउँपालिकाको वडा नं १, २ र ३ मा पर्ने गरगरे, राक्से र कनौटामा पहिरो खसेपछि सडक पूर्ण रूपमा अवरुद्ध भएको हो ।
त्यस्तै, रिडी–वामीटक्सार सडकअन्तर्गत सत्यवती गाउँपालिका–६ को डहरे खोला, चन्द्रकोट गाउँपालिका –८ को तल्लाफाँट र रिडी–खज्र्याङ सडक खण्ड पनि पहिरोका कारण बन्द छन् ।
गुल्मीसहित आसपासका क्षेत्रमा विगत तीन दिनदेखि लगातार हल्का र मध्यम खालको वर्षा भइरहेको छ । निरन्तरको वर्षाले कालीगण्डकी नदीको जलस्तर समेत बढ्न थालेको जिल्ला प्रशासन कार्यालयले जनाएको छ । प्रशासनले नदी किनारका बासिन्दालाई सतर्कता अपनाउन आग्रह गरेको छ ।
मंगलबार, साउन २० गते २०८२
Aug 05 2025 Tuesday
