इन्द्रेणीपोष्ट
बागमती, २७ साउनः बागमती प्रदेशका नवनियुक्त मुख्यमन्त्री इन्द्रबहादुर बानियाँले आज अपराह्न ४ः०० बजे बस्ने प्रदेशसभा बैठकमा विश्वासको मत लिँदै छन । बैठकको सम्भावित कार्यसूचीअनुसार मुख्यमन्त्री बानियाँले विश्वासको मत प्राप्त गर्ने प्रस्ताव पेस गर्ने तयारी गरिएको प्रदेशसभा सचिवालयका सचिव रामकुमार पौडेलले जानकारी दिए ।
नेपाली कांग्रेस र नेकपा एमालेका ६४ जना प्रदेशसभा सदस्यको समर्थनमा यही साउन २० गते मुख्यमन्त्री नियुक्त भएका बानियाँले एक सातापछि विश्वासको मत लिन लागेका छन । नेपालको संविधानको धारा १६८(४) तथा प्रदेशसभा नियमावली २०७४ को नियम १४३(१)) बमोजिम ३० दिनभित्र विश्वासको मत लिने प्रावधानअनुसार उनले प्रस्ताव अघि बढाउन लागेका हुन ।
यसैबीच सत्तारुढ कांग्रेस र एमालेले आफ्ना प्रदेशसभा सदस्यलाई अनिवार्य उपस्थित भई विश्वासको मत दिन ह्वीप जारी गरेका छन् । कांग्रेसका सदस्य सचिव मीनकृष्ण महर्जन र एमालेका प्रमुख सचेतक एकालाल श्रेष्ठले संयुक्त रूपमा ह्वीप जारी गरेका छन ।
प्रदेशसभाको बैठक आजदेखि नयाँ भवनमा सञ्चालन हुँदैछ । भवनको सम्पूर्ण निर्माण कार्य सम्पन्न भई हस्तान्तरण भइसकेकाले आजको बैठक त्यहाँ आयोजना गर्न लागिएको हो । २०७७ मङ्सिर १० गते शिलान्यास भई १८ महिनामा सक्ने लक्ष्यसहित सुरु गरिएको निर्माण कार्य ठेकेदारको ढिलाइका कारण करिब पाँच वर्षपछि सम्पन्न भएको हो । पाँच करोड २९ लाख रुपैयाँ लागतमा अर्घाखाँची–सगुन–पारामाउन्ट जेभीले भवन निर्माण गरेको हो ।
बुधबार, साउन २८ गते २०८२
Aug 13 2025 Wednesday
