इन्द्रेणीपोष्ट
काठमाडौं । नेपाल टेलिकमले मुलुकभरका ज्येष्ठ नागरिकको सम्मानस्वरूप निःशुल्क सिमकार्ड वितरण गर्ने भएको छ । संयुक्त राष्ट्रसंघको आयोजनामा विश्वव्यापी रूपमा अक्टोबर १ मा मनाइने अन्तर्राष्ट्रिय ज्येष्ठ नागरिक दिवसको अवसर पारेर टेलिकमले ज्येष्ठ नागरिकलाई निःशुल्क सिम वितरण गर्ने भएको हो ।
असोज १५ देखि २५ गतेसम्म ६० वर्षमाथिका नागरिकलाई निःशुल्क सिमकार्ड वितरण गर्ने जनाएको छ । सिममा १० रुपैयाँ ब्यालेन्स हुनुका साथै ४० मिनेट कुराकानी गर्ने, २० वटा सन्देश पठाउने र ६० एमबी डाटा प्रयोग गर्न सकिने सुविधा एक महिनासम्म उपलब्ध हुने जनाइएको छ ।
नेपाल टेलिकमका देशभर रहेका कार्यालयका काउन्टरहरूबाट ज्येष्ठ नागरिकहरूले यो सुविधाको उपयोग गर्न सक्ने कम्पनीले जनाएको छ । नेपाल टेलिकमले आफ्नो संस्थागत सामाजिक उत्तरदायित्वअन्तर्गत ज्येष्ठ नागरिकलाई उपलब्ध गराउने निःशुल्क सिमको सुविधाले उनीहरूलाई सूचना प्रविधिको पहुँचमा ल्याउन सहयोग पुग्ने अपेक्षा गरेको छ ।
