इन्द्रेणीपोष्ट
काठमाडौं । आफ्नो दसौं महाधिवेशनअन्तर्गत नेकपा (एमाले)ले शनिबार देशभर एकसाथ वडा अधिवेशन सम्पन्न गरेको छ ।
एमाले केन्द्रीय कार्यालयका सचिव शेरबहादुर तामाङले देशभरबाट आज (आइतबार) बिहानसम्म प्राप्त रिपोर्टअनुसार ६ हजारवटा भन्दा बढी अधिवेशन सम्पन्न भएको जानकारी दिए ।
तर ठ्याक्कै संख्या भने आज दिनभरमा निश्चित गरिने उनले बताए । ‘जे होस् अहिलेसम्मको रिपोर्टले ६ हजारभन्दा माथि नै वडा अधिवेशन सम्पन्न भएको देखाएका छन्’, उनले भने ।
यस्तै अहिलेसम्म सम्पन्न सबै वडा अधिवेशनमा सर्वसम्मत नेतृत्व चयन भएको जानकारी पनि कार्यालय सचिव तामाङले दिए ।
‘कतै निर्वाचन भएको रिपोर्ट आएको छैन, सबैमा सर्वसम्मत नै भएको जानकारी पाएका छौं’, उनले भने ।
देशभर ६ हजार ७ सय ४३ वडा छन्।
