इन्द्रेणीपोष्ट
काठमाडौं । नेकपा (माओवादी केन्द्र)को नयाँ नेतृत्वका लागि महाधिवेशनस्थल प्रज्ञा भवनमा स्थायी कमिटी बैठक जारी छ ।
नयाँ केन्द्रीय समिति र १५ सदस्यीय पदाधिकारी टीम सर्वसम्मत बनाउने प्रयासस्वरुप माओवादी स्थायी कमिटी बैठक बसिरहेको हो ।
माओवादी अध्यक्ष प्रचण्डले केन्द्रीय समिति र पदाधिकारी सर्वसम्मत चयन प्रयास जारी राखेका छन् ।
त्यही प्रयासस्वरुप उनले शनिबार बन्दसत्र हलमा सम्बोधन गरेपछि पहिलो पटक निर्वाचन कार्यतालिका संशोधन गरिएको थियो ।
सहमतिका लागि भन्दै माओवादीले शनिबार राति ८ बजेदेखि तय गरिएको निर्वाचन कार्यतालिकालाई आइतवार २ बजेसम्मका लागि संशोधन गरेर सारिएको थियो ।
तर माओवादी नेतृत्वले अझै पनि सहमतिमै नेतृत्व चयनका लागि प्रयास गरिरहेको छ । त्यसकै लागि माओवादीले आइतवार २ बजेदेखि हुने भनिएको निर्वाचन कार्यतालिकालाई २ घण्टा पर सारेको छ ।
माओवादीको निर्वाचन समितिले अब उम्मेदवारी मनोनयनलाई अपरान्ह ४ बजेदेखि ६ बजेसम्मलाई तोकेको छ ।
त्यस्तै मतदान कार्यक्रमलाई सोमबार बिहान ८ बजेदेखि दिउँसो १ बजेर २५ मिनेटसम्मलाई कायम गरिएको छ ।
