इन्द्रेणीपोष्ट
दार्चुला । दार्चुलाको मार्मा गाउँपालिकाका प्रमुख प्रशासकीय अधिकृत रोशन अधिकारी सुतिरहेको सरकारी निवासमा राति ढुंगामुढा र आगजनी भएको छ ।
जिल्ला प्रहरी कार्यालय दार्चुलाका अनुसार अज्ञात समूहले बिहीबार राति पौने २ बजेतिर प्रमुख प्रशासकीय अधिकृत अधिकारी बस्ने सरकारी निवासमा आगजनी भएको हो ।
‘राति प्रमुख प्रशासकीय अधिकृत सुतिरहेका बेला ढुंगामुढा र आगजनी भएको विवरण आएको छ । हामी घटनाको अनुसन्धान गरिरहेका छौँ’, जिल्ला प्रहरी कार्यालय दार्चुलाका प्रहरी निरीक्षक गोविन्द भण्डारीले भने ।
उनका अनुसार ढुंगाले झ्यालका सिसा फुटेका छन् । निवासमा रहेका पर्दा, किताब, बेडमा क्षति पुगेको छ । प्रमुख प्रशासकीय अधिकृत रोशन अधिकारी भने शकुसल रहेको प्रहरीले जनाएको छ । घटनापछि अधिकारीले राति भागेर प्रहरीलाई जानकारी दिएका थिए ।
आगजनी गरी अज्ञात समूह फरार भएको प्रहरी निरीक्षक भण्डारीले बताए । आगजनी गरिएको भन्ने खबर पाएपछि जिल्ला प्रहरी कार्यालयबाट प्रहरी निरीक्षक दर्शन खड्का नेतृत्वको टोली पनि घटनास्थलमा खटिएको छ ।
आगजनीका कारण तथा यसमा संलग्नको पहिचान खुलेको छैन । अज्ञात समूहको खोजी तथा घटनाको अनुसन्धान भइरहेको प्रहरी निरीक्षक भण्डारीले बताए ।
