इन्द्रेणीपोष्ट
काठमाडौं । आज (शुक्रबार)बाट सुरु भएको कक्षा १२ को परीक्षामा एक नक्कली परीक्षार्थी पक्राउ परेका छन् । उनी काठमाडौं स्वयम्भूस्थित रेन्वो इन्टरनेशल कलेज ठूलो भर्याङ परीक्षा केन्द्रबाट पक्राउ परेका हुन् ।
शान्ति शिक्षा माध्यमिक विद्यालयमा ठहिटीमा अध्ययनरत टंकबहादुर घर्तीको अनिवार्य अंग्रेजी विषयको परीक्षा दिने २३ वर्षीय नक्कली परीक्षार्थी आदेशजंग शाहीलाई स्वयम्भू प्रहरीले पक्राउ गरेको हो । शाही छेडागाड नगरपालिका–५ बडावन जाजरकोट घर भई हाल काठमाडौं बागबजार बस्दै आएको प्रहरीले जनाएको छ ।
घर्तीले दिने अनिवार्य अंग्रेजी विषयको परीक्षा शाहीले दिइरहेको थाहा पाएपछि उनलाई परीक्षाहलबाट निस्काशन गरेर प्रहरीलाई जिम्मा लगाएको उक्त कलेजका प्रिन्सीपल विनोदबाबु ढकालले बताए ।
यस विषयमा आवश्यक कारबाहीका लागि अनुसन्धान भइरहेको प्रहरीले जनाएको छ ।
