इन्द्रेणीपोष्ट
सिन्धुली, ३१ साउन – दुधौली नगरपालिका–१ गिचिहानीस्थित बस्तीमा आज दिउँसो विचित्रा खोलामा आएको बाढी पसेपछि १० घर डुबानमा परेका छन् । अचानक घरमा पानी पसेपछि भाग्ने क्रममा ५९ वर्षीया भन्द्राकुमारी दनुवार घाइते भई उपचारका लागि दुधौली नगर अस्पतालमा लगिएको जिल्ला प्रहरी कार्यालयका प्रहरी उपरीक्षक लालध्वज सुवेदीले जानकारी दिएका छन ।
बाढीले दनुवार परिवारको घरसहित गाईगोठ तथा ध्यानवतीकुमारी दनुवार, बुद्धलाल कुमार, आशा अधिकारी दनुवार, लक्ष्मीकुमारी दनुवार, सङ्गीता थापा, शिवनाथ दनुवार, निसा दनुवार, बृर्जलालकुमार दनुवार र केदार गिरीको एकतले घर डुबानमा परेका छन् ।
बस्तीमा मानवीय क्षति भने नभएको र पीडितलाई अस्थायी आवासको व्यवस्थापन गर्ने कार्य भइरहेको प्रहरीले जनाएको छ ।
यसैबीच जिल्ला प्रशासन कार्यालयले मनसुन सक्रिय रहेकाले थप विपद्को सम्भावना रहेको भन्दै सतर्कता अपनाउन आग्रह गरेको छ । सहायक प्रमुख जिल्ला अधिकारी अनुज भण्डारीका अनुसार बिपी राजमार्गको सिन्धुली खुर्कोट सडक खण्डमा भदौ १ गतेदेखि १५ गतेसम्म साँझ ५ बजेदेखि बिहान ५ बजेसम्म सवारी सञ्चालनमा पुनः रोक लगाइएको छ ।
आइतबार, भदौ १ गते २०८२
Aug 17 2025 Sunday
