इन्द्रेणीपोष्ट
काठमाडौं । नेपाली काँग्रेसले महाधिवेशन प्रतिनिधिमा पराजितहरुले जिल्ला कार्यसमितिमा उम्मेदवारी दिने व्यवस्थालाई प्रस्ट पारेको छ । काँग्रेसको केन्द्रीय निर्वाचन समितिले जिल्ला कार्यसमितिको सभापतिबाहेक पदमा महाधिवेशन प्रतिनिधिमा पराजितहरुले उम्मेदवार हुन पाउने कुरालाई प्रस्ट पारेको हो ।
काँग्रेस निर्वाचन समितिका संयोजक महादेव प्रसाद यादवले सोमबार एउटा परिपत्र जारी गरि महाधिवेशन प्रतिनिधिमा पराजित भएपछि जिल्ला सभापति बाहेकका पदमा उम्मेदवार हुन पाउने उल्लेख छ ।
उनका अनुसार उक्त व्यवस्था दुई वा दुईभन्दा बढी प्रतिनिधि सभा क्षेत्र भएका जिल्लामा मात्र लागू हुनेछ। काँग्रेस निर्वाचन समितिका सदस्य गोल कृष्ण घिमिरेका अनुसार यो नयाँ व्यवस्था होइन । १२ औं महाधिवेशनदेखि निर्वाचन समितिमा बसेर काम गरिरहेका उनले रातोपाटीलाई भने, ‘यो नयाँ व्यवस्था होइन ।
यो विधानमै व्यवस्था छ । तर धेरै निर्वाचन अधिकृतले यो कुरा नबुझेर महाधिवेशन प्रतिनिधिमा पराजितले जिल्ला कार्यसमितिमा उम्मेदवार हुन पाइँदैन भन्ने अर्थ लगाउन थाले । अनि हामीले निर्णय गरेर पठाएका हौं ।’
सोमबार गोरखाको जिल्ला अधिवेशनमा महाधिवेशन प्रतिनिधिमा पराजितलाई जिल्ला कार्यसमितिको उम्मेदवार बन्न निर्वाचन अधिकृत रोक लगाउनु खोजपछि उक्त निर्णय गरिएको उनको भनाइ छ । घिमिरेले भने, ‘१३ औं महाधिवेशनमा पनि महाधिवेशन प्रतिनिधिमा पराजित भएकाहरुले जिल्ला सभापति बाहेकमा उम्मेदवार हुन पाउनु भएको थियो ।’
